(يـــقـــــول مــن عــــــدى )

يقول مِن عدَّّى على راس عالي
رجمٍ طويلٍ يدهله كِـلِّ قِرنـاس ..

في راس مرجومٍ عسير المنالِ
تلعب به الأرياح مع كِلِّ نسناس ..

في مهمهٍ قفرٍ مِن النَّـاس خالـي
يشتاق له مِن حسِّ بالقلب هوجاس ..

قعدت في راسه وحيـدٍ لحالـي
كنِّي براس الرِّجم مذهب وحرَّاس ..

متذكِّرٍ في مرقبي وش جرا لـي
وصفقت بالكفين ياسٍ على ياس ..

أخذت أعد أيامها والَّليالـي
دنياً تِقلَّب ماعرفنا لها قياس ..

كم فرَّقت مابين غالـي وغالـي
لو شفت مِنها ربح ترجع للإفلاس ..

يقطعك دنياً مالهـا أول وتالـي
لو ضحكت للغبن تقرع بالاجراس ..

المستريح الَّلي من العقل خالي
ماهو بلجَّات الهواجيس غطَّاس ..

ماهوب مِثلي مشكلاتـه جلالـي
أزريت أسجلهن بحبرٍ و قرطاس ..

حملي ثقيـل وشايلـه بإحتمـالِ
وأصبر على مُرّ الِّليالي والأتعاس ..

وارسي كما ترسي رواس الجبالِ
ولايشتكي ضلعٍ عليه القدم داس ..

لاخاب ظنَّي بالرِّفيق الموالي
مالي مشاريهٍ على نايد الناس ..

لعل قصرٍ مايجيلـه ظـلالِ
ينهدِّ من عال مبانيه للساس ..

والبوم في تالي هدامـه يلالـي
جزاك ياقصر الخنا وكر الأدناس ..

لاصـار ماهـو مدهـلٍ للـرجـالِ
وملجا لمن هو يشكي الضيم والباس ..

حسناك يامنشي حقوق الخيالي
ياخالق أجناسٍ ويامفني أجناس ..

متـى تربِّـع دارنـا والمفـالـي
وتخضر فياضٍ عقب ماهيب يبَّاس ..

ونشوف فيها الديدحـان متوالـي
مثل الرِّعاف بخصر مدقوق الألعاس ..


وينثر على البيدا سوات الزوالـي
يشرق حماره شرقة الصبغ بالكاس ..

للــشـــاعــر / مـحـمـد الأحـمـد الـسـديـري (رحـمـه الله)